शासकीय नोकरीच्या पात्रतेतून मराठीला वगळल्याच्या निषेधार्थ वास्को येथे आंदोलन

मुरगाव मराठी राज्यभाषा निर्धार समितीची निदर्शने ; मराठी भाषेला अधिकृत मान्यता देण्याची मागणी शासकीय नोकऱ्यांसाठी केवळ कोंकणी भाषेला पात्रतेचे निकष म्हणून मान्यता देण्याच्या निर्णयाचा निषेध करत मुरगाव मराठी राज्यभाषा निर्धार समितीच्या वतीने वास्को नगरपालिकेच्या आवारात निदर्शने करण्यात आली . आंदोलनकर्त्यांनी हा निर्णय पक्षपाती असल्याचे सांगत, गोव्यात मोठ्या प्रमाणावर बोलली जाणारी आणि सांस्कृतिक दृष्ट्या महत्त्वाची असलेल्या मराठी भाषेकडे सरकारने दुर्लक्ष केल्याचा आरोप केला. मराठीने राज्याच्या सांस्कृतिक आणि ऐतिहासिक विकासात मोलाचे योगदान दिले असल्याचे नमूद करत, मराठी भाषेला शासकीय नोकरी पात्रतेत अधिकृत मान्यता मिळावी, अशी मागणी आंदोलनकर्त्यांनी केली.