पेडणेतील ओझरी येथे बिबट्याचा धुमाकूळ — तीन महिन्यांत ११ वासरांचे बळी

गावकरी भयभीत; वारंवार विनंती करूनही पिंजरा न बसवल्याची शेतकऱ्यांची खंत — वन विभागाने तात्काळ कारवाईची मागणी पेडणे तालुक्यातील ओझरी येथे बिबट्याने दहशत माजवली असून, गेल्या तीन महिन्यांत तब्बल ११ वासरांचा बळी घेतल्याची माहिती स्थानिक शेतकरी राजाराम रमेश नाईक यांनी दिली. वारंवार पत्रव्यवहार करूनही वन विभागाने अद्याप बिबट्याला पकडण्यासाठी पिंजरा बसवलेला नाही, अशी गावकऱ्यांची तक्रार आहे. परिसर दाट जंगलाने वेढलेला असल्याने ग्रामस्थांमध्ये भीतीचे वातावरण निर्माण झाले असून, विशेषतः शाळेत जाणाऱ्या मुलांच्या सुरक्षेबाबत पालकांमध्ये चिंता वाढली आहे. गावकऱ्यांनी वन विभागाने तातडीने कारवाई करून जनतेला दिलासा द्यावा, अशी मागणी केली आहे.